Home Uncategorized MFA Noord cu anochi di Informacion riba Herencia

MFA Noord cu anochi di Informacion riba Herencia

SHARE

ORANJESTAD – Aña a habri y MFA Noord ta cla pa tene su prome Anochi di Informacion. Esaki ta diamars 24 di januari proximo entre 7’or pa 9’or di anochi cu e topico ‘Herencia’. Esaki ta un ripiticion pa demanda popular despues cu e topico aki a keda presenta den 2016 cu un sala totalmente yen. E lectura ta posibel danki na cooperacion di Notaris mr. Tromp y Grupo Nucleo y a opta pa tene awo mirando e cambionan cu a bira efectivo den ley di herencia for di 1 di januari 2017.
Rudy Leysner ta representante di Grupo Nucleo cu ta reuni diferente organisacion di 60+ riba nos isla for di añanan caba cu e obhetivo di trece nan interes dilanti y organisa actividad. Sr. Leysner a enfatisa cu ta necesario pa hopi di nos sa kico ta e circumstancianan cu por bin dilanti ora ta papia di herencia. Ken tin derecho? Ki ora ta haya derecho? Por nota den nos comunidad cu hopi biaha ta bin problema den famia pa motibo di esaki. Tin leynan cu ta specifica tur asunto di Herencia. Pesey mes a invita Notaris mr. Tromp comparti informacion y contesta pregunta.
Grupo Nucleo ta wak e MFA’nan y den e caso aki MFA Noord como un aliado pa ta yuda organisa evento suministrando facilidad, pero tambe sosten cu relacionnan publico y promocion. Pa medio di e base di dato di MFA Noord ta acerca hendenan grandi cu tambe ta bon pa bin tende. “E ta un punto cardinal caminda hende ta encontra otro y ta forma un parti social den e comunidad,” asina Leysner a indica.
E actividad ta dirigi riba e grupo di 60+ sin embargo persona di tur edad interesa den e tema, ta bon bini. Ta recomenda pa yega tempran pa por haya bon luga pa sinta. Pa mas informacion di esaki y otro actividadnan den MFA Noord, ‘Like’ y bishita pagina di Facebook: MFA Noord Aruba.