Home International Humane Society ta encontra caso extremo di abuso di bestia na Detroit

Humane Society ta encontra caso extremo di abuso di bestia na Detroit

SHARE

Detroit, Merca – Kathy Bilitzke a conoce hopi caso di abuso di bestia ora cu e a cuminsa traha pa Michigan Humane Society 4 luna pasa. Pero e no tabata prepara pa locual e a encontra diamars. Kathy a haya un yamada riba e ‘cruelty hotline’ for di un persona hopi preocupa.

E informacion a pone e team di rescate mobilisa mes ora. Na yegada nan a encontra un Rottweiler mix hopi maltrata y a transporte pa hospital di bestia mes ora. E cacho tawata tin varios lesion serio.

E cacho yama, Baron, su oreanan y nanishi a wordo corta completamente afo. Patras di su pianan tambe e tabata tin corta. Kathy Bilitzke, director di Michigan Human Society, ta conta cu “normalmente nos no ta mira e tipo di abusonan aki, pero esaki si ta un caso extremo.”

E abuso tabata asina extremo cu Michigan Humane Society a publica riba Facebook cu nan ta ofrece un recompensa di 2500$ pa e persona cu por duna informacion di e persona responsabel pa e abuso aki. Nan a haci esaki cu e meta pa asina por haya husticia pa Baron.

Baron a haya tratamento medico y ta stabil, pero no ta cla ainda pa wordo adopta. Apesar di tur locual e a pasa aden e ta un cacho hopi lief y ta bay bon cu tur hende.

Abuso di bestia ta algo cu ta pasa hopi rond mundo ,hasta aki na Aruba. Ta importante pa cuida bestianan y mas ainda tambe pa raporta abuso di bestia na e autoridadnan concerni.