Home Uncategorized Gladys Croes di Bos di Paradera: “Paradera ta bon bezig, nos ta...

Gladys Croes di Bos di Paradera: “Paradera ta bon bezig, nos ta riba bon caminda”

SHARE

ORANJESTAD –  E siman aki MFA Paradera, mescos cu MFA Noord, a reuni cu nan klankbordgroep. Yama Bos di Paradera, e miembronan cu ta habitante di e bario, a haya un presentacion for di gerente di MFA Elton Hart riba con funcionamento a bay te aworaki y kico tin planea pa tuma luga durante 2017. Gladys Croes, un di e miembronan, a expresa cu e ta hopi contento di loke el a tende durante e reunion y di e direccion cu su districto ta tumando.

Croes a splica cu e grupo yama ‘Bos di Paradera’ ta den proceso pa delinea kico y con ta bay asisti gerencia di MFA Paradera y otro desaroyonan positivo den e bario. “Tin hopi entusiasmo. E grupo ta dinamico. Tin hopi interes y bon trabou den ekipo y mi ta kere cu nos por haci hopi cos,” e ciudadano a expresa.

Na final di e reunion Croes a bay cu e impresion cu Paradera ta bon bezig y riba bon caminda. E ta bisa esaki pasobra e ta corda con un tempo Paradera tabata bon organisa y tabatin bon union, pero cu tempo esaki a caba ya cu awor hopi hende ta biba cera y no conoce otro mas. Awor e ta kere cu danki na MFA, na e iniciativa pa crea un grupo Bos di Paradera y pa e animo cu ta reina, por trece e union ey bek den bario.

Entre e tareanan di e miembronan di Bos di Paradera, ta inclui pa transmiti e comentario, idea y deseonan cu e habitantenan di e bario por tin, y sostene MFA den e actividadnan social, educativo y cultural cu ta realisa. Pa mas informacion, bishita pagina di Facebook/MFA Paradera Aruba.