Home Uncategorized Durante cumbre di paisnan miembro di FIFA na Miami FIFA a keda...

Durante cumbre di paisnan miembro di FIFA na Miami FIFA a keda impresiona cu desaroyonan den futbol na Aruba

SHARE

A uza Arubaanse Voetbal Bond como ehempel den con por desaroya un organisacion boluntario pa profesional.

ORANJESTAD, Aruba –  E siman aki, entre 17 pa 19 di januari ta tumando luga e “FIFA Executive Football Summit” na Miami, na Merca. Tanto Presidente di Arubaanse Voetbal Bond, esta Richard Dijkhoff como tambe e Secretario General interino ta atendiendo e cumbre aki, hunto cu un lista largo di otro paisnan participando.

Durante e cumbre, e Presidente di FIFA a presenta nan vision pa futuro, cu e titulo “FIFA 2.0” mientras cu a probecha pa elabora riba crecemento di wega di futbol, e futuro di desaroyonan den e deporte rey. Manera ta haciendo na Aruba tambe ultimo aña, na nivel di FIFA a dedica un bon rato riba e tema delicado di transparencia, dunamento di cuenta, cooperacion, servicionan, educacion y con ta midi progreso y exito den futbol.

Cu tur e paisnan miembro presente, a presenta e formato di e campeonato mundial di futbol FIFA 2026. Aki a para un rato na desaroyonan tecnico y di hubentud, pero cu e tema special pa promove mas futbol bao di mucha muhenan.

FIFA a presenta nan “Forward Program” na paisnan miembro, cu un splicacion masha amplio di con ta yega na fondonan disponibel den cuadro di e programa di progreso y desaroyo aki. Claro cu tur donacion ta bay man den man cu un lista di rekisitonan y formula pa midi si e programa a logra e obhetivo.

Presidente di Arubaanse Voetbal Bond, Richard Dijkhoff a haci un presentacion di e logronan di AVB den e ultimo 3 añanan. Paisnan miembro presente a keda masha asombra y despues di e presentacion varios a acerca e representantenan di Aruba cu peticion pa splica mas con a logra tanto cambio, tanto desaroyo y tanto programa na mes momento asina. Tanto e ehecutivonan di FIFA como tambe CONCACAF tabatin bon palabra pa AVB y nas mas cu un ocacion a uza “Aruba” como ehempel den e otro presentacionnan.

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.