Home Uncategorized Rodney Kock, Garage Centraal Aruba: “Nos consenshi ambiental no ta un tarea...

Rodney Kock, Garage Centraal Aruba: “Nos consenshi ambiental no ta un tarea solamente di Gobierno; ta hunto nos ta logr’e”

SHARE

ORANJESTAD – “E consumidor na Aruba ta wak e necesidad di un miho maneho ambiental,” segun opinion di Rodney Kock. Como Gerente di Mercadeo pa Garage Centraal, Kock a realisa e lansamento di nan model di auto nobo, e Hyundia Ioniq cu ta 100% electrico algun dia atras y a splica con vision y maneho di Gabinete Mike Eman a prepara e tereno pa sector comercial uni na e esfuersonan cu ta haci na Aruba.

Como empresa local, e agencia di auto ta detectando interes caba di parti di e consumidornan. “Loke nos tin cu haci awo ta tuma e interes ey como un punto di partida, anto crea un movecion cu ta priminti di logra un sistema nobo di transportacion mas eficiente, miho pa medio ambiente y cu hende por bay facil cune,” asina Kock a expresa.

E gerente di mercado pa Garage Centraal Aruba a continua bisando cu “Ora bo tin un Elmar cu ta preparando un infrastructura y nan tin plannan hopi importante, esey ta yuda tambe; ora bo tin un Gobierno cu ta pone tarifa special di invoerrechten; ora bo tin banconan cu ta pone tarifa special di interes, esaki ta un esfuerzo conhunto pa logra un miho mentalidad y nos mester di dje pasobra nos mundo no por sigui warda pa nos haci algo miho.”

Kock ta comparti e pensamento di Prome Minister Eman cu “nos tin cu start awo y nos no mester depende di otro hende bisa nos cu nos tin cu haci’e. Esaki ta un cuenta di orguyo cu bo ta riba un isla asina chikito, pero toch cu consenshi di kico e situacion ta y e curashi pa tuma decision na tur nivel.” E ta invita companianan priva y publico pa tambe tuma e compromiso pa haci algo miho paso ta bal la pena.