Home Uncategorized EVELYN WEVER-CROES : NOS MESTER PERCURA PA UN CASO MANERA DI SENOR...

EVELYN WEVER-CROES : NOS MESTER PERCURA PA UN CASO MANERA DI SENOR FROG’S NO PASA NUNCA MAS

SHARE

MEP lo exigi un deposito di invesionistanan di exterior

ORANJESTAD  — Lider di MEP Evelyn Wever-Croes a reacciona riba e caso den cual trahadornan di Señor Frog’s a wordo confronta cu e lugar a sera di un dia pa otro anja pasa na November, y despues a wordo engaña pa abogadonan di e compania cu ta pone cu awe nan ta para man bashi.

“E caso di señor Frog’s, ta un ehempel con trahadornan inocente ta haya nan mes den problema serio pa motibo cu e inversionista ta abusa. Pa motibo cu situacion na Aruba no ta bai bon, inversionistanan ta purba baha na awa sin cumpli, y ta e mama y tatanan di famia ta wordo perhudica den porta di dianan di fiesta, sin seguridad di trabou, y sin seguridad di entrada.

Mi mester duna un palabra di elogio na e trahadornan cu a actua di biaha sin miedo, para pa nan derecho. Nan a bai stroba e persona pa sali di Aruba, y forse regla su asuntonan, pero lamentablemente no a logra.

MEP TIN E SOLUCION PA E PROBLEMA

E problemanan cu nos ta mira ta sucede cu inversionistanan cu ta bin di exterior, si cos no bai bon, nan ta dal porta sera y baha na awa bai. Nos mester uni, para hunto, y bisa cu e cos aki no por sigi mas. No sinta man crusa y warda e sigiente victimanan. Mi ta haya falta di accion di parti di gobierno.

Cu MEP den gobierno lo bin un paro na e abuso aki, e mama y tatanan di famia lo haya prioridad.

Nos lo bin cu sistema di deposito pa inversionistanan cu bin di exterior, pa si mayan nan dicidi di baha na awa y  bai, e deposito ta para garantia pa e mama y tata di famia haya salario pa e sigiente lunanan. Esaki ta un manera pa atende cu e abuso aki. Asina nos ta manda un senjal cu nos kier inversionistanan si, pero hende drechi, decente y cu ta cumpli cu ley y regla. Si bo kier inverti na Aruba pero bo no kier cumpli cu ley y regla, keda afo!

Cu MEP den gobierno, esaki lo haya prioridad, nos lo pone e interesnan di e trahadornan prome” lider di MEP Evelyn Wever-Croes a duna di conose.