Home Uncategorized Seis preso a huy di prizon na Venezuela y lo por ta...

Seis preso a huy di prizon na Venezuela y lo por ta na Aruba

SHARE

ORANJESTAD, Aruba –  Cuerpo Policial Aruba ta pidi colaboracion di comunidad pa ta atento riba posibel movecion cu por ta tumando lugar na Aruba di parti di 6 preso Venezolano cu a huy dialuna ultimo di e prizon “Centro de Coordinacion Policial Nro.2 de la Policia” di Estado Falcon pa mas o menos 2:00am. Nan no a habri buraco den e murayanan, pa locual ta kere cu nan a huy via dak. 

Pa e hecho aki a detene 8 Polis cu ta bao investigacion. Durante e revision realisa madruga a haya den un telefon celular di un di e presonan, cu despues di e huymento, nan lo mester a topa cu un auto cu lo a transporta nan na Punta Macoya, unda aparentemente un boto lo a trece e presonan na un isla den Caribe.

E funcionarionan di Polifalcon ta realisando e investigacion y esfuerso di e servicionan di  inteligencia ta buscando e delincuentenan cu a huy di e prizon na Falcon.
Ta trata di William Xavier Vazquez Muller, Elio Rafael Lopez Molleda, Gregorio Jose Medina Miquilena, Carlos Alexander Fernandez Arias, Cristofer Isidro Lanoy y Javier Alexander Rojas Ojeda.

Cuerpo Policial di Aruba ta pidi ciudadanonan pa ta atento pa cualkier movecion straño den area di nos costa y riba tera. Pa informacion of tip relaciona cu paradero di e presonan aki por yama tipline di Polis na 111-41.