Home Uncategorized Stephanie Croes di MEP: “Nos Libertador Betico Croes ta inspira tur generacion....

Stephanie Croes di MEP: “Nos Libertador Betico Croes ta inspira tur generacion. Un tremendo lider por inspira un nacion completo…”

SHARE

Nos Libertador Betico Croes pa decadanan a inspira tur generacion. A lanta pueblo den su totalidad pa lucha y logra nos Status Aparte, cual inicialmente por a mustra di ta imposibel, Betico Croes a haci’e posibel. Betico a inculca den nos tur pa stima nos bandera y nos himno y pa pasa esaki na e generacionnan cu ta sigui. Den su propio palabranan: “Nos yiunan, e generacionnan cu ta bay sigui y yiunan di nos yiunan lo ta bay ser orguyoso di e pueblo aki”. Sigur cu Aruba ta orguyoso di Betico, realisando Status Aparte conhuntamente cu apoyo di henter un nacion, dunando Aruba su libertad: nos propio Gobierno, nos propio Parlamento, nos propio Gobernador, nos propio himno y bandera, nos propio moneda y mas importante nos propio voz! Mi ta orguyoso di Betico Croes, aunke mi tawata tin unicamente 2 aña ora nos Libertador a fayece, su lucha y su logronan ta mas bibo cu nunca. Betico a siña nos cu no tin lucha sin sacrificio y no tin sacrificio sin gloria. Nos cada un ta responsabel pa yuda Aruba bay dilanti, nos cada un ta responsabel pa mantene locual nos grandinan a lucha pe y sigui cu e lucha pa conserva y preserva e libertad di Aruba. Lamentablemente Betico Croes a fayece prome cu e por a wak Aruba su bandera bay halto pa prome biaha, ni tampoco el a logra wak Aruba liber manera semper el a desea. Esaki tawata su sacrificio pa su pais, pa Aruba, esaki tawata su sacrificio pa nos, e amor inmenso cu nos cada un mester tin den nos curason. Cu Aruba na curason y mente, Aruba su bienestar nunca lo a bay perdi. Sigur cu pa e aña electoral aki cada un di nos por ta e diferencia pa gara y tuma bek e rienda di nos pais Aruba. Grandi y Chikito, esaki ta nos lucha, esaki ta nos Aruba. Dia 25 di januari venidero nos ta celebra dia di Betico, dia di nos Libertador. Mi mensahe na Aruba ta lo siguiente:

“Historia di Aruba ta valioso, e ta siña nos pa nos no comete e mesun erornan, e ta inspira nos pa nos duna mas di nos mes pa yuda otro sin cu nos mester wordo pidi pa yuda. E ta sali di nos curason. Riba dia di Betico, pensa bek riba e mensahenan cu Betico a laga atras, bay bek den historia, pa hunto nos sigura nos futuro. Un tremendo lider cu a inspira un nacion, cu a inspira tur generacion pa decadanan na Aruba. Futuro di nos tur, Futuro di Aruba ta den man di cada un di nos, di cada un generacion cu ta haci nos pais unico.

Den clausura mi ta desea di invita pueblo di Aruba pa bin celebra cu nos dia 24 di januari na Savaneta, cuminsando asina cu e celebracion di dia di nos Libertador Betico Croes.