Home Uncategorized Señora di edad victima di atraco arma den su propio hogar

Señora di edad victima di atraco arma den su propio hogar

SHARE

Lago Heightsstraat – Diamars 1or di marduga warda di polis San Nicolas ta wordo informa di un atraco arma cu a tuma luga na un hogar den Lago Heightsstraat. Patruya a bay mes ora y na yegada nan a topa cu un señora di 70 aña hopi spanta y emociona pa locual a caba di sosode.

E anciana a conta e agentenan cu e tawata na soño momento cu e a spierta paso e a sinti algo frieuw ta touch su cabes. Esaki a resulta di ta e arma di candela cu un di e atracadornan a pone na e señora di edad su cabes.

E señora a describi su atracadornan pa ta uno cu ta color bruin, e otro ta color scur y ambos ta papia bon ingles. Tambe e a informa cu nan tur dos tawata bisti cu un ski mask riba nan cabes. E anti-socialnan a bay cu varios articulo di e señora. Nan a bay cu cellularnan, placa y joyas. Tambe nan a purba bay cu e television pero no a logra bay cu’ne.

Como cu e señora ta di edad halto y ta sufri di diabetes e susto aki a pone cu e a sinti su mes malo y mester a wordo controla pa personal di ambulance. E ta lamentabel cu un  señora di edad mester pasa den un experiencia traumatico asina. Mirando cu e señora a keda basta emociona slachtofferhulp a wordo pidi pa yuda papia y calma e victima.

E caso lamentabel aki a keda den man di atraco team. Departamento tecnico di polis tambe a presenta na e sitio pa haci su investigacion.