Home Uncategorized Mireille Sint Jago (MEP): Clarisca Velasquez conoce e dicho: “Porco sushi ta...

Mireille Sint Jago (MEP): Clarisca Velasquez conoce e dicho: “Porco sushi ta busca muraya limpi p’e frega su lomba riba dje?”

SHARE

E politiconan den Parlamento di fraccion di AVP ta duna politica un mal nomber. E manera cu nan ta sigui ataca partido MEP enbes di haci nan trabou como Parlamentario, cual ta controla Gobierno den nomber di pueblo, ta un berguensa. Aruba merece mihor! Awor cu e desaster di e Gobierno Mike Eman I y II ta briya mas cla cu un diamante den solo, algun Parlamentario di fraccion di AVP kier tira lodo riba e Parlamentarionan di MEP? Mi ta puntra mi mes, ta unda e rabo aki ta krul? Pakico tin parlamentarionan di fraccion AVP cu tin tanto miedo di e forsa di fraccion di MEP?

Cambio den kiesverordening
E ultimo articulo di Parlamentario Clarisca Vasquez, por ehempel, cu e titulo: “MEP ta incapaz y floho pa traha y cambia kiesverordening lo no yuda nan tampoco.” No tin ningun argumento cu ta splica pakico un cambio den kiesverordening lo ta algo malo. Den mi opinion, un cambio den kiesverordening lo trece un miho representacion den Parlamento cu n’e, pasobra esun cu mas voto di cada partido, lo ta esun cu lo drenta Parlamento. E lo preveni pa un hende cu apenas 100 voto, pues cu pueblo no a demostra di tin confiansa den dje pa representa nan den Parlamento, por drenta Parlamento a base di su number riba lista. Algo, cu ami mes, ta haya cu ta un cambio pa mihor. Si tin un hende riba lista cu tin mas voto cu bo, e lo mester haya e chens pa representa pueblo den Parlamento prome cu bo! Pero tanten cu e kiesverordening no cambia, nos tur ta man mara. Tur hende riba lista ta hende cu lo mester ta capaz pa e trabou di un Parlamentario, si no e lo no por a subi lista di e partido. E diferencia ta, cu e kiesverordening ta stipula, cu a base di secuencia di number riba lista ta wordo acerca pa drenta Parlamento.

Fin di carera di Clarisca
Ora cu Partido MEP ta den Gobierno y nos cumpli cu e deseo di pueblo pa cambia e kiesverordening prome cu eleccion 2021 y esaki si fraccion di AVP no bay di acuerdo pa haci e cambio aki prome cu September awor, un candidato di AVP, manera Alvin Howell mes lo drenta Parlamento prome cu Clarisca Velasquez (335 voto). Of un situacion cu candidato di AVP John van der Biezen, cu na dos eleccion tawata tin mas voto cu Norman Roos, lo no keda afo. Tampoco, Jeffrey Kelly (97 voto), lo no a drenta Parlamento prome cu Richard Dirksz (217) y John van der Biezen (200 na‘13). Kisas Parlamentario Velasquez tin miedo cu su era y carera den politica ta cabando. Su cantidad di voto na 2009 tawata 562, pues el a baha drasticamente te na solamente 335 voto na 2013. Algo straño si bo ta wak cu e tawata un Parlamentario. E mester a crece den voto. Mi conseho na Clarisca ta pa e eleccion aki sigur, e lo mester tene honor na su mes y ni subi lista di ningun partido mas. Mi ta kere cu pueblo ta prefera 335 biaha mas un miembro di fraccion di MEP, cu pa un motibo valido no por ta presente den Parlamento, pero cu si a yuda prepara e reunionnan y a aporta na e mocionnan y preguntanan, cu un persona manera Parlamentario Clarisca Velasquez cu lo ta presente pa grita “VOOR” den Parlamento, pero no por haci ni bisa nada drechi y cu su comportacion ta un berguensa pa henter Aruba. Pero ya, manera e dicho ta: Porco sushi ta busca muraya limpi p’e frega su lomba riba dje.