Home Uncategorized Chelsea Manning su sentencia a wordo reduci y lo recobra libertad na...

Chelsea Manning su sentencia a wordo reduci y lo recobra libertad na mei

SHARE

Washington, USA – Diamars atardi Presidente Obama a tuma e decision di reduci Chelsea Manning su sentencia di 35 aña, unda e lo por sali di prison 17 di mei 2017. Chelsea Manning a wordo sentencia na aña 2013 pa motibo di a ‘leak’ documentonan confidencial na Wikileaks.

E ‘leak’ aki a wordo mira como uno di mas grandi den historia Mericano y e castigo duna tawata uno di mas largo tambe.  Aña pasa Sra. Manning a purba di comete suicidio dos biaha. Como un persona transgenero e ta difícil pa Sra. Manning keda sera den un prison militar pa hende homber.

E decision aki pa yuda Chelsea Manning haya libertad a wordo tuma paso segun vocero di White House, Joshua Earnest, e informacion cu a wordo leaked no tawata asina peligroso pa seguridad nacional. Tambe Sr. Earnest a splica cu Chelsea Manning a pasa den ful e proceso huridico caba. E no a huy y busca refugio na un pais stranhero manera, por ehempel Sr. Edward Snowden a haci.

E documentonan cu Manning a yuda publica a revela e abusonan contra detenidonan na man di oficialnan militar di Irak cu tawata traha cu e Mericanonan y tambe cu e mortonan di cuidadanonan den e guera na Irak tawata hopi mas halto cu cifranan oficial.