Home Uncategorized Aruba Tourism Authority a presenta e resultadonan di e ‘Restaurant Gap Analysis’

Aruba Tourism Authority a presenta e resultadonan di e ‘Restaurant Gap Analysis’

SHARE

Investigacion unda a colecta 1022 encuesta conhuntamente cu Facultad di Hotel and Tourism Management (HTMS) di Universidad di Aruba y Universidad di Sur Carolina

Oranjestad- Aruba Tourism Authority conhuntamente cu varios socionan den gobierno, sector priva, NGO’s y e pueblo di Aruba ta trahando ariba un plan dirigi riba desaroyo duradero di Aruba su producto turistico. E plan lo ta uno cu ta tene cuenta cu e balansa entre nos comunidad, nos bishitantenan, nos socionan y nos medio ambiente, pa asina por alinea y determina siguiente pasonan pa haci di Aruba uno mas Dushi pa biba, como tal uno Dushi pa bishita. E plan aki ta carga e titulo ‘Cu Mira pa Futuro’. Diferente investigacionnan sigur lo yuda na provee informacion cu ta asina clave pa accionnan cu mester wordo defini como parti di e plan aki.

Un investigacion cu ta brinda hopi informacion riba e producto y oferta di restaurantnan versus kico e bishitantenan ta spera y ta pensa di nan bishita, a ser condusi aña pasa. E “Restaurant Gap Analysis” ta indica netamente e ‘buraco’ cu mester ‘yena’ pa por yega na ofrece un producto y oferta optimal, unda tur atributonan importante ta debidamente presente y ta coincidi cu locual e cliente turista ta busca y ta haña cu ta importante. Aruba Tourism Authority a traha directamente cu Facultad di Turismo di Universidad di Aruba cu e aporte y experticio di profesora Di Pietro di Facultad di Turismo di Universidad di Sur Carolina na Merka, pa realisa e investigacion aki. Un total di 11 restaurant rond di Aruba a participa den e investigacion aki, caminda nan tambe a ricibi nan resultado di e analysis.

John Wardlaw, Dean di e facultad di HTMS di Universidad di Aruba a yama bon bini na esnan presente hunto cu CEO di A.T.A., Ronella Tjin Asjoe-Croes kende a presenta ‘The role of restaurants in our visitor’s experience’. Diferente plannan y programanan di parti di A.T.A. tambe a keda presenta, entre otro Darice Solognier Niche Specialist di A.T.A. kende a presenta ‘A.T.A.’s support to restaurants: marketing and culinary programs’, y Patrick Melchiors Destination Service Manager kende a elabora riba e ‘Aruba Quality Seal’ cu ta un Proyecto actual di parti di A.T.A.

Highlight riba e programa tabata profesora Robin DiPietro, Ph.D., M.B.A., kende a duna un presentacion caminda e la duna un splicacion di e investigacion y a finalisa cu un resumen y  analysis di e resultadonan. Un total di 1022 turista a wordo encuesta y a duna feedback riba e siguiente areanan: (1) Food Quality (2) Restaurant Cleanliness (3) Restaurant Atmosphere (4) Social Connecters (5) Price (6) Authenticity (7) Brand Image (8) Sustainability. 84% di esnan encuesta ta di Merca, 52% tin un ingreso annual di US$ 130,000.00 of mas y a categorisa e resultadonan entre “repeaters” y esnan cu ta bishita Aruba pa promer biaha, ‘First Timers’.

Tambe a elabora na un manera hopi cla riba e atributonan cu e bishitantenan encuesta a indica cu ta importante y cu ta score halto den caso di Aruba, otronan cu nan no ta hanja cu ta hopi importante y cu tin un score halto si den caso di Aruba. Aspectonan di importancia a score halto, por lo general, esta ‘ service & food items’. Si mester pone mas atencion riba inclusion di ‘healthy food options’ den e oferta. Importante ta cu e indica atributonan cu ta importante y unda Aruba ta score abou, pues area nan di mehoracion y oportunidadnan. Por lo general e scora tabata positivo pa participantenan, pero e analysis aki a proba cu tin un diferencia entre locual cu ta wordo ofreci den nos restaurantnan y locual cu ta wordo percibi dor di nos bishitantenan, relaciona cu e Brand Value y Brand Identity di e restorantnan na Aruba. Esaki ta nifica cu tin un oportunidad pa mehora e calidad di servicio y tambe e calidad di e contenido y variacion di e menunan cu ta wordo ofreci den nos restaurantnan. Asina aki por crea mas balor di marca y identidad pa nos bishitantenan. Creando mas balor, por mehora e experiencia di nos bishitante y por resulta cu nan lo gasta mas ora di come na restaurantnan na Aruba. Por nota tambe cu ‘First Timers’, cu ta index mas halto den e categoria di bishitantenan mas hoben, ta pone hopi balor riba autenticidad, nan kier ‘Eat Like the Locals’. Mientras cu e ‘Repeater’ tin como pensamento ‘Vacation! Calories don’t count, relationship matter’. E aspecto di autenticidad den locual ta ofrece ta tambe importante pa e ‘Repeater’ cu ta bishita entre 2-5 biaha. Traha riba ‘Value for Money’, elevando e value y eventualmente cobrando mas pa esaki ta sigur un oportunidad cu a wordo subraya.

E meta di tipo di analysis nan aki ta pa amplia e conocemento ariba e aspectonan cu ta di importancia pa nos bishitantenan, caminda stakeholdersnan; entre otro departamento di gobierno, sector priva, NGO’s y e comunidad di Aruba por disemina e conocemento aki strategicamente. Asina aki por proporciona cu puntonan mas concreto na e plan di desaroyo di Aruba su produco turistico. Mas importante ainda, mehoracion den e area aki ta contribui na un patronchi di gasto eleva di parti di esnan cu ta bishita.

A.T.A. ta gradisi Facultad di Hotel and Tourism Management (HTMS) di Universidad di Aruba y Universidad di Sur Carolina, pa e tremendo colaboracion, y lo sigui traha estrechamente cu otro pa asina realisa investigacionnan importante pa nos desaroyo turistico. Mas cu claro ta gradisi e restorantnan cu a participa tambe.