Home Uncategorized Prome Minister Eman a bishita Departamento di Cultura

Prome Minister Eman a bishita Departamento di Cultura

SHARE

ORANJESTAD- Prome Minister Eman a bishita Departamento di Cultura unda el a wordo ricibi door di director Dumfries, subdirectora sra. Thiel y sr. Robert Maduro. Desde cu Cultura ta resorta bou Prome Minister Eman, e ta trahando duro pa yuda engrandece cultura di Aruba den tur forma posibel. Despues di a cera conoci cu cada empleado a sigui un reunion cu gerente di DCA. Prome cu esey Robert Maduro a tuma su guitara y a toca e pieza di propio suelo ‘Nos a sali paranda’ pa asina trece un dushi ambiente. Den e reunion cu a sigui gerente di DCA a papia cu Prome Minister pa spik’e tur loke nan a haci caba y kico nan kier mira cambia y mehora. Prome Minister Eman a scucha cu hopi atencion loke sr. Dumfries y sra. Thiel a trece padilanti y a conta nan di su plannan.

Director di Departamento di Cultura Aruba drs. Siegfried Dumfries a guia Prome Minister Eman durante su bishita na e departamento. Prome Minister, kende ta encarga awor cu Cultura, den un reunion cu gerente di DCA a discuti varios punto interesante. Na 2014 tabatin un cumbre nacional di Cultura unda a identifica 12 punto di cual algun tabatin prioridad. Nan ta formacion,  informacion y educacion den diferente disciplina di arte. Documentacion y Digitalisacion di herencia cultural; Calendario Nacional Cultural y Financiamento di proyectonan cultural. Tambe a papia di otro puntonan di atencion e.o. infrastructura tecnico y desaroyo di personal.

Despues di e reunion Dumfries tabata masha satisfecho. “E reunion a bay den un ambiente masha amical y hopi importante ta cu Minister a scucha nos cu atencion. Nos a papia di e cumbre di 2014 unda nos a redefini nos maneho.” Loke ta hopi importante ta duna atencion na e herencia cultural di Aruba, asina Dumfries a splica. “Importante ta pa nos investiga y documenta nos herencia cultural. Fiestanan nacional tambe ta hayando nan debido atencion door di nos departamento y aunke tin un comision encarga cu e fiestanan aki, nan ta resorta bou DCA. Loke ta bon tambe di e encuentro cu Prome Minister ta cu nos a crea e base, e plataforma y structura pa sigui traha hunto tanto cu Ministerio como tambe otro instancianan cultural. Hunto nos por ehecuta plannan grandi.”

Sra. Thiel a bisa cu e reunion a resulta den un combersacion hopi interesante. “Nos por a splica di e tres proyectonan grandi cu nos tin pa ehecuta e aña aki. Tambe nos a papia riba e plannan cu nos ta trahando riba nan pa futuro. Tur e interesnan y plannan cu Minister Eman mes tambe tin a wordo treci dilanti. El a pidi nos pa pensa riba nan y asina nos a intercambia riba varios tema. Nos ta mira cu nos ta bay tin bon cooperacion cu otro den futuro.”