Home Uncategorized Palo di Luz den Sabanilla Abao ta trece trankilidad cerca su habitantenan

Palo di Luz den Sabanilla Abao ta trece trankilidad cerca su habitantenan

SHARE

ORANJESTAD – Accion di Bario diahuebs ultimo a trece hopi cos bon pa e barionan di Sabanilla Abao y Santa Lucia den e districto di Santa Cruz. E bishita di Prome Minister Eman semper ta compaña pa accion di limpieza y control di muskita, entre otro. Pero loke e habitantenan ta mas entusiasma y gradici p’e ta e puntonan di luz publico cu a instala na diferente punto di e bicindario.
Jessica Kelly, por ehempel, ta un di esnan cu a haya bishita di Premier Eman na su cas. El a expresa cu e ta “contento di wak e akibandanan despues di hopi tempo cu nos no a haya bishita di ningun akibanda y tambe contento cu nos ta bay haya luz di caminda.” Esaki ta algo cu Kelly y su bisiñanan tin hopi tempo ta warda riba dje, y finalmente ta Gabinete Mike Eman ta haci e deseo ey un realidad. Un deseo cu awo e kier pa mas hende tambe haya.
Otro habitante, esta Angela Werleman, a splica con anochi ta tende diferente zonido, pero dor cu ta asina scur no ta tribi di sali wak. “Mi ta keda contento cu nan pone paso akibanda ta hopi scur. Nan ta bon haciendo loke nan ta haci paso mester haci algo pa Aruba.” el a indica.
Na final di e bishitanan, Minister President Mike Eman a confirma su compromiso di continua cu e bishitanan di bario, y hopi di nan lo ta combina cu instalacion di luz publico LED pa trece mas seguridad y trankilidad den barionan di nos isla.