Home Uncategorized Myriam Werleman y Gerrick Croes: “Nos a lucha 10 aña y deseo...

Myriam Werleman y Gerrick Croes: “Nos a lucha 10 aña y deseo di habitantenan di Santa Lucia pa haya luz di caya a bira realidad”

SHARE

ORANJESAD – Habitantenan di Santa Lucia y sigur sra. Myriam Werleman y su yiu Gerrick Croes, a keda contento cu e promesa cumpli cu Prome Minister Mike Eman a haci door di cuminsa cu instalacion di luznan (LED) di caya pa e bario di Santa Lucia, Ayo y Sabanilla Abou.

“Nos ta hopi contento pasobra ta 16 aña pasa ora cu mi a bin biba aki banda, mi a cuminsa colecta firma,” sra. Myriam Werleman, dilanti kende su cas a pone e prome luz LED pa caya, a bisa cu hopi alegria. E habitantenan a organisa un celebracion pa e evento aki cu nan ta considera grandi pa nan bario.  Sra. Werleman a recorda cu prome cune, tabatin dos otro persona cu ya tabata pidi Gobierno pa pone luz pero no a logra. “Nos si a sigui y no a drumi, a sigui lucha pa hay luz pa e bario, pa e siguridad di e habitantenan pasobra ta hopi scur mes anochi,” sra. Werleman a conta despues di e ceremonia unda Prome Minister Mike Eman a cende den forma simbolico e prome LED dilanti su cas na Santa Lucia. Y a agrega cu “mi ta masha agradecido na Minister President cu porfin nos a haya luz den bario.” Prome Minister Eman mesora a reacciona bisando sra. Werleman cu “e tabata un placer pa cumpli cu e derecho cu ciudadanonan tin”.

Gerrick Croes di su banda, kende a apoya su mama den e accion di firma pa luz den bario, a recorda cu e accion a cuminsa tempo e tabata hoben, un 16 aña pasa, ora cu nan a bin biba den e bario. “E tabata manera un bario ignora. Nos a pensa pa colecta firma y hunto cu mi mama nos a subi auto pasando cas pa cas cu e pensamento cu nos deseo un dia lo bira realidad. Awe despues di 10 aña tin luz den Santa Lucia y Sabanilla Abou. Ademas di un deseo, e tabata un necesidad grandi pa cual nos ta masha agradecido. Esaki mi kier a bisa den nomber di e habitantenan,” Croes a bisa.

Despues di a cana den e barionan di Ayo, Santa Lucia y Sabanilla Abou, a yega na un lista di deseo di habitantenan pa luz den e areanan cu ta mas scur. Asina e area aki ta bira e parti unda mas luz LED ta bay wordo instala bou di e programa “Luz den Bario”, cu ta wordo promovi door di Prome Minister Mike Eman y su Gabinete.