Home Uncategorized Lotto pa Deporte a firma acuerdo cu Tele Aruba

Lotto pa Deporte a firma acuerdo cu Tele Aruba

SHARE

ORANJESTAD, Aruba – Diabierna ultimo a tuma luga firmamento di un acuerdo entre Lotto pa Deporte y e directiva di Tele Aruba. Minister di Salud Publico y Deporte, Dr. Alex Schwengle hunto cu miembronan di directiva di Lotto pa Deporte tabata presente durante e acuerdo historico aki.

E mandatario a expresa cu e pasonan cu Lotto pa Deporte ta tumando, cual ta conta cu su sosten, ya cu nan tin un hopi bon relacion cu Canadian Bank Note (CBN). El a agrega cu meta di e acuerdo aki ta pa dado momento Lotto produci 10 pa 12 miyon florin. Locual a haci ta firma un adendum na e contract cu tin cu CBN cu ta pa crea mas placa awo caba pero a palabra cu cierto pasonan mester wordo tuma, entre otro cu lo amplia e pakete di productonan cu CBN of Lotto ta ofrece na comunidad.

Minister Dr. Alex Schwengle a agrega cu den Parlamento lo mester adapta e ley di Catochi pa por garantisa bida largo pa e Loteria di Aruba, “dunando un sorto di monopolio, pero alabes garantisa tambe cu e loteria lo duna un minimo di su omzet na deporte. Pero tambe e catocheronan cu lo haya un permiso mester entrega un minimo di nan omzet na deporte”. Segun e mandatario, e cifranan cu e tin ta 20% pa loteria y 10% pa e catocheronan. Ta calcula cu lo por produci 10 pa 12 miyon pa deporte. Esey ta nifica cu e ora deporte no ta bay depende ni un florin mas di Gobierno.

E maneho di deporte ta bay ta den mundo di deporte mes. “E interaccion entre politica y mundo di deporte ta bay ta diferente. E temporada di manipulacion di politiconan den deporte ta bay bira menos y bo ta duna hopi mas balor na e hendenan den deporte mes”, asina Minister Schwengle a subraya. Den deporte tambe mester bin cierto cambionan. Mester bin mas madurez y realisa cu bon gobernacion ta hopi importante. Mester tin e curashi pa coregi foutnan, el a agrega.

E mandatario ta gradici Lotto pa Deporte pa nan confiansa den su persona y pa nan bon trabao. E stap cu nan a tuma di firma e adendum riba e contract cu CBN. “Mi ta gradici CBN pa ta abierto pa trece mehoracion y pa trece mas placa pa deporte. Mi ta gradici Tele Aruba cu nan profesionalismo”. Segun Minister di Deporte, si e calculacion ta bon y logra e cambionan den e ley di catochi, e ta kere cu otro aña caba lo por yega na e cifranan aki.

Benvinda de Souza, miembro di e directiva di Lotto pa Deporte a splica cu no tabata facil pa yega na negociacion. Asina cu bo tin un contract, e posibilidad pa haci cambio ta dificil, pero mirando e bon relacion entre Lotto, CBN y Minister, a logra pa nan yega asina leu pa por a renegocia. E logro aki ta nifica cu nos deportistanan awo ta haya mas sosten financiero, De Souza a remarca.

Presidente di e directiva di Lotto pa Deporte, Mr. Di-Stefano Wernet RA, a bisa cu esaki ta un dia historico tambe pa Lotto y pa Tele Aruba, cual ta un socio importante unda a firma e contracto di servicio aki. E contract aki ta encera cu Tele Aruba lo sigui yuda Lotto duna servicio pa e sorteo di e loteria y catochi. Esaki ta algo hopi importante pa e garantia y e credibilidad di e loteria, el a enfatisa.