Home Uncategorized Inspector pa islanan BES, Dr. Dirk van der Plas: No por preveni...

Inspector pa islanan BES, Dr. Dirk van der Plas: No por preveni horcan pero por garantisa cu ta bon prepara si

SHARE

ORANJESTAD, Aruba –Henter e mundo di cuido a topa diasabra y diadomingo ultimo den dos dia di seminario organisa pa Inspectie Volksgezondheid Aruba. Meta di e charla tabata pa repasa e ley cu a drenta na vigor dia 1 di januari 2017, subraya e cambionan y institui un forma di cooperacion entre e dunadonan di cuido y IVA, pa no solamente tin control pero tambe por garantisa trahamento hunto cu na final mester traduci den miho servicio y miho cuido na pashentnan en general.

Dana Kweekel, hurista y abogado di Inspectie Volksgezondheid di Sint Maarten (SXM) tabata un di e oradonan. A scoge pasobra Sint Maarten ta den mesun contexto cu Aruba y el a elabora riba con nan ta anda cu cierto temanan. Den e prome tayer a amplia riba a tareanan y den e di dos tayer a atende e maneho di antibiotica duna door di e comision di antibiotica di hospital. Nan a trece dilanti con nan ta anda cu antibiotica y con e ta wordo suministra.

Dr. Dirk van der Plas, Inspecteur van Gezondheidszorg Nederland pa islanan BES a remarca cu e seminario a cay den bon tera cerca dje. Loke ta di remarca p’e ta cu e ta dirigi riba mehoracion di calidad… “cu ta loke mi ta kere cu e Inspectie di Aruba lo mester accentua tambe. Esey ta loke tur hende kier na final di dia”. Pa loke ta e tema di calamidad e experto ta bisa cu como Inspectie no por preveni un horcan, pero loke si por pusha ta cu instancianan di cuido tin un plan pa kico nan mester haci den casonan di calamidadnan grandi… “manera si tin un horcan of subida di awa mester tin un maneho y esey nos ta stimula pa tin den e ramo di dunadonan di cuido.”

Dana Kweekel, hurista y abogado pa Inspectie Volksgezondheid na Sint Maarten (SXM) a expresa su mes bisando cu p’e e seminario a bay hopi bon. E por a ripara cu tin hopi bon interaccion entre dunadonan di cuido. “Akinan tin mas o menos mesun problemanan manera nos a haya y ta hayando na Sint Maarten asina ta e feedback cu nos ta haya riba dje ta hopi bon e ta reconocibel y e buskeda na solucionnan y e deseonan pa haya e solucionnan hunto ta algo hopi positivo”.

“Na Sint Maarten nos a ripara, cu nos ta pensa cu loke ta conta pa Hulanda y lo ta conta pa nos, tin duda riba kico ta un calamidad y ki ora mester anuncia calamidad. Kico ta pasa ora anuncia un calamidad. E ta wordo avisa demasiado poco na Inspectie,” e ta puntra. “Tin indicacion cu tin mas calamidad cu ta pasa cu no ta wordo informa y e mensahe cu mi ta purba saca eyfo ta informa pro activo aunke cu no ta sigur kico ta un calamidad”, asina e experto di Sint Maarten a conseha e participantenan. E ta sigur cu den combersacion cu Inspectie, kendenan mester evalua si tin cu straf, specialmente ora tin di haber cu e siguridad y calidad di servicio na pashent, pa asina mehora cuido, locual ta e meta di suministra informacion riba calamidad,” el a conclui.

E plan ta pa organisa mas di e tipo di charlanan y tayernan asina den e lunanan nos dilanti. Inspectie Volksgezondheid Aruba lo tene campañanan di informacion pa publico, pa nan sa nan derecho, pero tambe na e dunadonan di cuido, pa nan ta consciente di nan obligacion pa por garantisa cuido di calidad y sigur na tur pashent.