Home Uncategorized Cunukeronan di Sabanilla Abao contento cu bishita di Prome Minister Mike Eman

Cunukeronan di Sabanilla Abao contento cu bishita di Prome Minister Mike Eman

SHARE

ORANJESTAD – Durante Accion di Bario teni diahuebs ultimo den bario di Santa Cruz, Minister President a tuma tempo pa bishita dos persona en particular. Ta trata di Maximo Kelly y Ostaquio Werleman, kendenan ta probechando di e awacero di ultimo simannan. Premier Eman a busca pa sa cu tur cos ta bayendo bon cu nan plantacion y kico e, como Minister di Sector Primario, por yuda nan y tur otro cunukero na Aruba.

Maximo Kelly di Sabanila Abou tin un plantancion di pampuna, bonchi, concomber y tambe yambo. Den combersacion cu Prome Minister, Kelly a conta cu el a perde dos cosecha aña pasa dor cu awa no a yobe. Cos ta miho aworaki, y como aprecio, el a regala e mandatario un saco di concomber pela y limpi cla pa come. Ora cu a puntra Kelly con e ta haya e trabou cu Gobierno ta haciendo, el a expresa cu, como pensionado, “tur cos ta allright.”

Un caso particular ta esun di Ostaquio Werleman, kende a pesar di ta un persona cu limitacion fisico, asina mes e ta mobilisa den su cunucu y ta cria bestia. Cu ayudo di su senora Edith nan tin plantacion di pampuna, boonchi, mango, guyaba, appelsina, citroen grandi y tambe papaya.

Su cas y su salud tin mester di atencion; atencion cu Prome Minister Eman ya ta trahando riba dje pa brinda. “Tin un cos ta biniendo pa mi awo; mi ta bay haya yudanza,” asina Werleman a bisa despues di su combersacion cu Premier Eman. E mandatario a atende e caso aki hunto cu personal di BoBario, Serlimar, y a tuma datonan pa suministra na Departamento di Asuntonan Social.