Home Uncategorized Prome Minister Mike Eman prome pa core Hyundai Ioniq Sosteniendo conversion pa...

Prome Minister Mike Eman prome pa core Hyundai Ioniq Sosteniendo conversion pa autonan electrico

SHARE

ORANJESTAD – Diahuebs anochi Garage Centraal a realisa e lansamento di nan prome auto 100% electrico pa e mercado Arubiano. Pa e ocasion importante aki, a duna Minister President Mike Eman e honor di tabata e prome persona pa biba e experiencia di stuur un Hyundai Ioniq. Pa e mandatario, tabata un placer di atende e invitacion y cu esaki yuda promove e conversion di autonan convencional di gasolin, pa esnan electrico y sostenibel. Manera ta bon conoci, Gabinete Mike Eman a percura pa incentivonan manera reduccion den e tarifa di impuesto pa importacion, como tambe den e suma pa plachi di number cu e tipo di autonan aki.

E agencia di auto a gradici Premier Eman pa su cooperacion den e lansamento di e Hyundai Ioniq, pero tambe sigur pa ta e motor tras di e movimiento cu ta busca pa genera un cambio den consenshi con ta e manera mas sabi y sostenibel pa biba, pa ta menos dependiente di fuel y mas cuidadoso pa loke ta nos medio ambiente.

Profesionalnan di N.V. Elmar tambe a participa den e presentacion dunando un splicacion con e auto electrico por wordo recarga na e diferente puntonan rond di nos isla y e tempo necesario. Tambe a anuncia cu ta intencion di e compania di utilidad pa amplia e red di punto di recarga pa cubri henter e teritorio nacional, aunke e autonan aki tambe por wordo recarga na cas y ta hopi eficiente den nan consumo di energia.

Premier Eman a duna di conoce durante e evento, cu e ta sinti’e masha complace cu finalmente agencianan di auto ta asina leu cu ta cuminsa cu e importacion y mercadeo di autonan electrico. E transicion for di autonan convencional pa autonan electrico lo representa den futuro e mercado nobo di consumidornan pa nos compania nacional di electricidad.