Home Uncategorized Ministerio di Enseñansa ta organisa anochi di informacion cu topico “Studia na...

Ministerio di Enseñansa ta organisa anochi di informacion cu topico “Studia na Canada” diahuebs dia 19 di februari proximo

SHARE

Diahuebs dia 19 di februari proximo Ministerio di Enseñansa den cooperacion cu representantenan di Embaha di Canada lo tene un anochi di informacion pa tur studiante cu tin interes pa bai studia na Canada. E anochi di informacion lo tuma luga den room A di Universidad di Aruba y lo cuminsa pa 7:00 or di anochi.

Durante di e anochi di informacion lo duna informacion amplio ariba tur e posibilidadnan cu Canada ta ofrece na nos futuro studiantenan como tambe e diferente acuerdonan cu pais Aruba tin formalisa cu institutionan Canades. Banda di e diferente opcionan di estudio lo duna informacion tambe tocante e proceso di visa pa por studia na Canada.

E ultimo añanan por a tuma nota di e esfuersonan grandi di Ministerio di Enseñansa y Minister Michelle Hooyboer-Winklaar pa asina crea mas opcion di estudio den region na un prijs mas faborabel. Minister Hooyboer-Winklaar na nomber di gobierno di Aruba, a logra formalisa diferente acuerdo entre otro na Merca y Canada cu ta garantisa areglonan special na beneficio di nos studiantenan di Aruba. Na 2015 a yega na un acuerdo cu Seneca College estableci na Toronto Canada pa studiantenan Arubiano por ricibi un descuento substancial di 30% riba gastonan di estudio y recientemente a logra firma un otro acuerdo cu Centennial College cu ta encera un scholarship special di CAD $ 2000,- pa aña pa tur studiante Arubanio cu aplica y wordo admiti na e instituto. E acuerdonan aki ta ehempel di e beneficionan grandi pa nos studiantenan y ta haci Canada un opcion mas accesibel y atractivo pa studiantenan di Aruba. Durante di e anochi di informacion tambe lo anticipa riba e bishita di Bishop’s University di Quebec Canada cu lo ta na Aruba na fin di januari y tambe lo duna un bista riba e institutonan cu cual Aruba ta den deliberacionnan basta avansa pa asina formalisa acuerdonan den e lunanan nos dilanti.

Tur studiante cu ta interesa pa bai studia na Canada of tur mayor, studiante of publico en general cu kier mas informacion riba studia na Canada ta cordialmente invita pa e anochi di informacion aki. Durante di e anochi di informacion lo duna tur e informacion relevante cu studiantenan tin mester pa por bai studia na Canada y tambe lo tin espacio amplio pa haci pregunta. E anochi di informacion lo tuma luga diahuebs dia 19 di januari cuminsando pa 7:00or di anochi na Universidad di Aruba.