Home Uncategorized MEP ta recorda e di 26 aña di fayecimento di Guillermo Trinidad

MEP ta recorda e di 26 aña di fayecimento di Guillermo Trinidad

SHARE

Diadomingo awor 15 di januari ta recorda e di 26 aña di fayecimento di un gran politico Arubano, esta Guillermo Prospero Trinidad. Guillermo Trinidad a nace dia 25 di juni 1939 y a fayece dia 15 di januari 1991. Na bida e tabata diputado di Teritorio Insular di Aruba, miembro di Parlamento di Antiyas, miembro di Conseho Insular di Aruba, miembro di Parlamento di Aruba y Ministro di Finanza di Aruba. Fayecimento di Guillermo Trinidad a cay manera un bom na Aruba y en especial den seno di su partido MEP. Na 4 ocasion (1982, 1983, 1985 y 1989) Guillermo a aparece riba lista di MEP. Un y tur por corda ainda con hungando bala den e team di futbol forma door di su colega ministernan, cu Guillermo despues di e partido di futbol aki a sufri un atake di curason y cual a conduci na su fayecimento repentino.

Guillermo Trinidad a resalta den e periodo cu el a fungi como Ministro di Finanza y cual cartera el a maneha den un forma profesional, cu hopi dedicacion, integridad y sabiduria.

Na aña 1994 Gabinete Oduber II a duna reconocimento na e gran personahe aki aki door di duna e stadion cu ta keda den su pueblo di Dakota e nomber di Compleho Deportivo Guillermo Prospero Trinidad p’asina e futuro generacionnan keda recorda e gran politico aki. Partido MEP lo sigui recorda Guillermo Trinidad kende cu su vision y determinacion a contribui grandemente na progreso di pais Aruba.