Home Uncategorized Parlamentario mr. Xiomara Maduro: Ban laga decencia y bon ehempel reina...

Parlamentario mr. Xiomara Maduro: Ban laga decencia y bon ehempel reina bek den gobernacion di nos Pais

SHARE

E decencia pa felicita rey no por wordo compara cu e bahesa pa fomenta contra nos Gobernador

Minister Eman mester acepta cu su comportacion pa cu e nombracion di nos Gobernador nobo ta completamente for di sla y no ta digno di un representacion di un Prome Minister di nos Pais. Minister Eman a hiba un campania pa descredita y falta respet na nos Gobernador nobo door di cuestiona su integridad, door di bay asina baho pa hasta trece den publicidad malesa di un familiar y por ultimo door di presenta cu tres Minister so na Parlamento pa instalacion di e Gobernador y keda sin presenta na recepcion di Aña Nobo di Gobernador. Di e manera aki Minister Eman a falta respet no solamente na e persona y funcion di Gobernador na nos Pais, pero tambe a falta respet pa nos Rey den Reino Hulandes.

E comportacion infantil y foi sla aki di Minister Eman no por wordo compara ni tampoco hustifica bisando cu MEP tambe a falta respet na Rey door di no asisti na su coronacion. E diferencia ta bisto. MEP tabata tin e decencia pa felicita e Rey y a indica e motibo pa nos ausencia durante e coronacion na Hulanda. Nos di MEP no a hiba un campania baho di lastra, purba na descredita y falta respet na nos Gobernador manera cu Eman y AVP a haci. Esey ta e diferencia clave. MEP semper a trata nos Gobernador den representacion di Rey cu e debido respet y nunca a instiga Pueblo via radio y corant pa falta respet na nos Goberador manera cu Eman y AVP a haci durante e welga di hamber na 2014 na unda hasta a menasa Gobernador Refunjol, unda a tira awa riba su auto y hasta a bay asina lew pa tira webo y baranca riba su cas.

Awor na 2016 y ainda den 2017 nos ta mira con Minister Eman ta sigi riba e racha di falta di respet na nos Gobernador nobo y kier bin hustifica su mes door di cuestiona MEP su presencia na huramentacion di Rey. Wel e ta bisto, Minister Eman, e decencia pa felicita nos Rey hamas por wordo compara cu e bahesa pa fomenta odio y falta di respet contra nos Gobernador den representacion di nos Rey. Minister Eman na bienestar di nos Pais haci nos Pueblo un fabor di comporta como un Prome Minister y stop cu e mal ehempel aki cu ta dividi y pone Aruba su cara na berguensa den Reino. Ban laga decencia y bon ehempel reina bek den gobernacion di nos Pais.