Home Police Empleado di Burger King ta bira di cabes y ta ataca su...

Empleado di Burger King ta bira di cabes y ta ataca su coleganan

SHARE

ORANJESTAD- Diamars anochi alrededor di 10’or polis a wordo pidi pa bay Burger King di Caya Betico Croes. Informacion a indica cu tawata tin masha hopi gritamento den e establecimento. Un colega masculino lo a bira di cabes anto a ataca y hinka varios di su coleganan. Su coleganan mester a core pa a scapa nan mes di dje.

Mirando e gravedad di e situacion andando e momento ey, tur patruya den e area a bay pa e sitio. Momento cu polis a yega a encontra un dama so cu a wordo herida. Autoridad mes ora a detene e homber cu a comete esaki y a hibe warda.

Dos ambulance a yega na e sitio. Personal di ambulance a bay paden pa prepara e victima pa wordo transporta pa hospital.  No ta conoci si e dama a wordo corta of hinca. Slachtofferhulp y recherche a wordo pidi pa bin na e sitio.

No sa kico exacto kico a causa cu e empleado masculino a bira agresivo. Kisas e ta un persona cu un of otro malesa mental. Den su agresividad e por a herida un persona seriamente of por a kita bida di hende mes.

Ta spera cu autoridad por evalua e estado mental di e cabayero aki y dun’e e trato psicologico necesario pa asina e no ta un peliger pa comunidad.