Home Politics Minister President Mike Eman “Plasa Padu ta otro ehempel di renobacion di...

Minister President Mike Eman “Plasa Padu ta otro ehempel di renobacion di producto Aruba pa proteha nos historia y cultura”

SHARE

ORANJESTAD – Den su discurso nacional pa ciere di aña, Minister President Mike Eman a papia di e vision cu Gobierno di Aruba pa loke ta renobacion di centro di ciudad, restauracion di edificionan historico y con esaki ta beneficia e pais den su totalidad. For di Plasa Padu den centro di Gobernacion, Premier Eman a anuncia cu inauguracion di e reconocemento grandi pa compositor di nos himno nacional, ta den prome lunanan di 2017 durante un celebracion nacional. “Plasa Padu ta bay ta e ehempel di gratitud cu Aruba ta demostra na e compositornan di nos himno Padu Lamper, Rufo Wever, Lio Booi.”

Eman a splica cu Plasa Padu ta conecta na henter e centro historico aki y ta forma parti di su vision pa renobacion di centro di ciudad, un centro di ciudad cu su gobierno a haya ocho aña pasa den pleno deterioro. “Awe cada aspecto y cada edificio ta representa e amor cu nos tin pa nos herencia cultural, pa nos historia, pa loke Aruba a traha cu homber y muhenan balente.”

E renobacion aki ta cubri for di Watertoren pa edificio di Corte, for di La Salle College y Dominicus College yegando mas cerca di nos centro historico, henter nos Caya Principal acopla na henter e area di waf. E ultimo aki a wordo renoba cu plasanan cu ta conecta cu rancho y for di eynan atrobe cu Caya Grandi y hunto cu e sitionan historico.

Tin Museo Arkeologico, Stadhuis, edificio di Rekenkamer cu antes tabata Biblioteca Nacional y un tempo tambe Juliana School. Tambe Fort Zoutman ta restaura, Gabinete di Gobernador, edificio di Parlamento, edificio di Bestuurskantoor y naturalmente e orguyo grandi cu ta e edificio moderno di Cocolishi cu ta e nucleo di centro di gobernacion di Pais Aruba.

“Hunto nan ta conecta na un vision grandi di eleva e calidad di producto Aruba y eleva e calidad di bida. Cu cada Arubiano por sinti den nan curason palpita e stimacion cu nos tin pa e herencia grandi y e debocion pa crea un pais cu nos ta orguyoso di dje,” Premier Eman a expresa. “Yegando 2017 nos ta sinti caba e emocion grandi cu ta biba den curason di cada Arubiano pa ora nos lanta e bandera, pa ora nos canta e himno nacional, nos por bisa hunto no unicamente a cana un caminda di vision y idealismo, pero nos a cana un caminda tambe di realisa den cada fase e soñonan cu nos tabatin.”

Concluyendo, Minister President a bisa cu awe e vision y soño ta un realidad traduci den plan social, den plan fisico, den plannan cu a transcende nos fronteranan pa e respet grandi cu Aruba a bin ta adkiriendo durante e ultimo shete añanan aki di un gobernacion cu a wordo eligi riba plataforma di cambio; tur dia ta realisando e cambio grandi aki pa nos comunidad.