Home Uncategorized MEP PRESENTE NA CURACAO PA REUNION TRIPARTIET Cu Parlamento di Curacao...

MEP PRESENTE NA CURACAO PA REUNION TRIPARTIET Cu Parlamento di Curacao y Sint Maarten

SHARE
STA CRUZ — Un delegacion di parlamentarionan di MEP a biaha pa Curacao den fin di siman pa atende reunionnan cu demas parlamentonan den Reino.
Pa MEP a biaha srs. Ady Thijsen, Chris Romero y Guillfred Besaril.
Dialuna lo reuni cu demas parlamentonan di Curacao y Sint Maarten. Y desde diamars e parlamentarionan di Hulanda lo uni na e reunionnan pa IPKO.
Lo trata temanan di cooperacion mutuo entre otro riba tereno di famia y hobennan, enseñanza, salubridad. E situacion na Venezuela tambe ta riba agenda.
Riba insistencia di AVP lo trata e temanan controversial entre gobiernonan di Aruba y Hulanda, entre otro e nombracion di Gobernador na Aruba y e Geschillenregeling.
MEP su posicion tocante e nombracion di Gobernador ta firme: locual cu Hulanda a hasi no tabata bon. Sinembargo tur locual cu a pasa ta culpa y responsabilidad di gabinete Mike Eman.
Na prome lugar pasobra sr. Mike Eman a tarda pa manda candidatos pa e funccion. Y despues cu su unico candidato, sr. Bermudez, no tabata aceptable pa Hulanda, e no a manda ningun otro alternativa. Sr. Eman a actua na forma masha iresponsabel cu algo asina importante, y mester carga e consequencianan. Gobiernonan di MEP a logra nombra 3 Gobernador, AVP no a logra nombra ningun Gobernador.
Pues apesar cu MEP no ta aproba e forma di proceder di Hulanda, e culpa di tur locual a pasa ta di Gabinete Mike Eman. Ta tempo awor pa nos pone e confrontacion aki un banda y sigi padilanti. Nos pais tin retonan grandi pa enfrenta, nos pueblo no kier mira mas confrontacion ni division.
Nos Pueblo kier union y trankilidad. Nos di MEP lo hasi tur lo posibel pa brinda nos pueblo e union y trankilidad aki, segun lider di MEP Evelyn Wever-Croes.